Abenduaren 18

Abenduaren 18an

Gorespenak

Goratzarrea

 Salterioa (astearen egunekoa: III. edo IV. astekoak)

 

 

Jainkoaren itza

Erm 13, 11-12

    Ordua da, lotatik izartzeko, sinisten hasi-barri haretan baino hurrago dogu gaur gure salbamena. Badoa gaua; ganean dogu eguna; kendu daiguzan, ba, ilunpetako egintzak, eta jantzi argizko armak.

R/. Zeure ganean, Jerusalem, * jagiko da Jauna. Zeure.

V/. Haren aintza zeurean agertuko da. * Jagiko da. Aintza Aitari. Zeure.

 Bened. ant.  Zagoze erne, hurrean da-ta gure Jainkoa.

 Bedeinkatua Jauna, Israelgo Jainkoa
    agertu eta bere herria askatu dauana;
    salbazino indarra deusku emon,
    bere morroi Dabiden etxean.

Halan hitzemona eban-eta bere santuen bidez,
    behinola bere profeta zituenen bidez;
    salbazinoa gure etsaien menpetik,
    gorroto deuskuen guztien eskutik.

Horrela egin deutse gure gurasoei erruki,
    bere alkarte santuaz oroiturik;
    egin eutson-eta  gure guraso Abrahami zin-hitza,
    Berak emongo euskula.

Gure etsaien eskutik gu atarata, bildur barik,
    izan gaitezan Haren zerbitzari;
    zintzo eta zuzen Beraren aurrean,
    gure egun guztietan.

Zu, barriz, seina,
    Goi-goikoaren profeta deitua izango zara,
    Jaunaren aurpegi aurretik joango zara-eta,
    Hari bidea prestatzera;
    erakustearren Haren herriari salbamena,
    euren pekatuen parkamena.

Gure Jainkoaren errai errukitsuekaitik,
    agertuko jaku Goiz-eguzkia ganetatik;
    ilunpetan eta herio-gerizpean dagozanei argi egitera,
    gure oinok bake-bidean zuzentzera.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant.  Zagoze erne, hurrean da-ta gure Jainkoa.

Eskariak

    Senide maiteok, egin deiogun otoitz bizien eta hilen epaile dan Jesu Kristo gure Jaunari, esanez:

ZATOZ, JESUS JAUNA

    —Pekatariak salbatzera etorri zaran Jesus Jauna: * zaindu gaizuz tentaldian jausteko zoritxarretik.

    —Epai-egunean agirian azalduko zaran Horrek: * azaldu eizu guregan, gu salbatzeko daukazun indarra.

    —Emoiguzu, Zure aginduak gogoz betetzeko laguntza, * maitasunean prestau gaitezan zure etorrerarako.

    —Belaunaldi guztietan onetsia zaran Horrek: * errukiz egizu, belaunaldi honetan zintzo bizi izan gaitezala, zure zorioneko itxaropenean, eta zure etorrera ospetsuan gure uste ona jarri daigula.

Gure Aita zeruetan zarana,
santu izan bedi zure izena,
etor bedi zure erreinua,
egin bedi zure nahia
zeruan bezela lurrean ere.
Emoiguzu gaur
egun honetako ogia,
parkatu gure zorrak
geuk ere geure zordunei
parkatzen deutsegun ezkero,
ez eiguzu itzi tentazinoan jausten
baina atara gagizuz gatxetik.

Otoitza
    Jainko ahalguztiduna, pekatuaren buztarri zaharrean lotuta gagoz aspalditik; iguzu, behin betiko libre egin gaizala, itxaroten dogun zure Semearen jaiotza barriak. Zurekin eta Espiritu Santuarekin batean Jainko eta errege bizi da-ta gizaldi eta gizaldietan.

Amaierea

V/. Bedeinkatu gaizala Jainko ahalguztidunak: Aitak eta Semeak eta Espiritu Santuak.
R/. Amen.

V/. Goazen Jaunaren bakean.
R/. Eskerrak Jainkoari.